Raza Musani 
ینگون: میانمار میں سمندری طوفان سے روہنگیا مسلمانوں کے کئی کیمپ تباہ اور سینکڑوں افراد ہلاک ہوگئے۔خیلج بنگال میں بننے والا طوفان موچا شمال مغربی میانمار اور بنگلہ دیش کے ساحلوں سے ٹکرایا تھا۔ طوفان نے میانمار کی شورش زدہ ریاست راکھین میں بڑے پیمانے پر تباہی مچائی، تیز ہواؤں اور بارشوں سے روہنگیا متاثرین کے کئی کیمپ صفحہ ہستی سے مٹ گئے۔ مقامی انسانی حقوق گروپ کا کہنا ہے کہ طوفان سے بڑے پیمانے پر نقصان ہوا ہے اور سینکڑوں افراد ہلاک ہوگئے ہیں۔ میانمار کی فوجی جنتا نے علاقے کو آفت زدہ قرار دیدیا ہے۔ ایک روہنگیا سماجی کارکن اور قومی اتحاد کی حکومت کی انسانی حقوق کی وزارت کے مشیر آنگ کیاو موئے نے بتایا کہ صرف سیٹوے میں ہی مرنے والوں کی تعداد 400 سے زائد ہے۔ ڈھائی سو کلومیٹر کی رفتار سےچلنے والی ہوا سے درخت اکھڑگئے۔ بجلی اور مواصلاتی ٹاور گرگئے۔ مواصلاتی نظام تباہ ہونے سے تباہی کے درست اعداد وشمار اور معلومات دستیاب نہیں۔ علاقے میں امدادی کام شروع کردیا گیا ہے اور متاثرہ علاقوں سے لوگوں کو نکالا جارہا ہے۔
