برطانیہ میں رکن پارلیمنٹ کا قتل، دہشت گردی قرار

لندن : برطانیہ میں حکمران جماعت کنزرویٹو پارٹی کے رکن پارلیمنٹ سر ڈیوڈ ایمس کے قتل میں ملوث صومالین نژاد مسلم شہری کو گرفتارکرلیا گیا۔ سر ڈیوڈ ایمس ایسیکس میں انتخابی حلقے میں ایک چرچ میں لوگوں کے مسائل سن رہے تھے کہ خاموش کھڑے ملزم نے اچانک چاقو نکال کر ان پر 17وار کیے۔ ملزم نے بھاگنے کےبجائے پولیس کا انتظار کیا اوراہلکاروں کے پہنچنے پر خود کو ان کے حوالے کردیا۔ برطانوی پولیس نے سر ڈیوڈ امیس کی چاقو حملے میں ہلاکت کو دہشت گردی کا واقعہ قرار دیا ہے۔ وزیر داخلہ نے قتل کو جمہوریت پر حملہ قرار دیتے ہوئے کہا ہے کہ ملک بھر میں اراکین پارلیمنٹ کی سیکیورٹی کا ازسرنو جائزہ لیا جائے گا۔ برطانوی میڈیا کا کہنا ہے کہ جنگ عظیم دوم کے بعد سے اب تک 6 برطانوی اراکین پارلیمنٹ قتل کیے گئے ہیں۔