جنوبی غزہ میں مجاہدین کی کارروائی، 4 اسرائیلی فوجی ہلاک، 5 زخمی

اسرائیلی فوج نے اعتراف کیا ہے کہ جنوبی غزہ میں جمعہ کو ہونے والی جھڑپوں کے دوران اس کے 4 فوجی ہلاک اور 5 دیگر زخمی ہوئے ہیں۔ فارس نیوز کے مطابق، صہیونی فوج نے باقاعدہ طور پر اعتراف کیا ہے کہ جنوبی غزہ کی پٹی میں فلسطینی مجاہدین کے ساتھ جھڑپوں میں 4 فوجی ہلاک اور 5 دیگر زخمی ہوئے ہیں۔ صہیونی فوج نے مزید بتایا کہ یہ فوجی ماگلان کی ایلیٹ یونٹ اور یالوم کی انجینیئرنگ یونٹ سے تعلق رکھتے تھے۔ اسرائیل کے آرمی ریڈیو نے صہیونی فوج کے خلاف فلسطینی مزاحمت کاروں کے اس مہلک حملے کی تفصیلات کے بارے میں لکھا ہے کہ ابتدائی تحقیقات سے پتہ چلتا ہے کہ کمانڈو بریگیڈ نے گزشتہ رات خان یونس کے قصبے بنی سہیلہ کے مغرب میں آپریشنل علاقے میں ایک نیا حملہ کیا جس میں کئی عمارتوں اور کچھ بنیادی ڈھانچے میں داخل ہوئے۔
جمعہ کی صبح 06:05 بجے ماگلان یونٹ کی ایک ٹیم اور یالوم کی انجینیئرنگ فورسز ایک ایسی عمارت میں داخل ہوئیں، جس کے بارے میں اطلاعات تھیں کہ حماس اسے استعمال کر رہی ہے اور ممکنہ طور پر وہاں سرنگوں کا نیٹ ورک موجود ہے۔ اس لیے اس عمارت کی تلاشی لینا ضروری سمجھا گیا۔ تقریباً 06:10 بجے، صہیونی فوجیوں کے اندر داخل ہونے کے چند منٹ بعد، عمارت میں ایک زوردار بم دھماکہ ہوا، جس کے نتیجے میں پوری عمارت ان پر آ گری۔ اس دھماکے اور عمارت کے منہدم ہونے کے باعث 4 فوجی ہلاک اور 5 زخمی ہوئے، جن میں سے ایک کی حالت نازک ہے جبکہ باقیوں کو درمیانے درجے کی چوٹیں آئیں اور انہیں فوری طور پر اسپتال منتقل کر دیا گیا۔
گزشتہ چند گھنٹوں کے دوران لاشوں کو ملبے سے نکالنے کا آپریشن بھی شروع کیا گیا، جس میں توپ خانے اور جنگی طیاروں کی مدد سے کئی گھنٹوں تک امدادی کارروائیاں جاری رہیں۔ تحقیقات کے مطابق، عمارت میں داخل ہونے سے پہلے معمول کی حفاظتی کارروائیاں جیسے کہ اوکتز یونٹ کے کتے اور کواڈ کوپٹرز بھیجے گئے تھے تاکہ مائنز کی موجودگی کی تصدیق کی جا سکے، لیکن دھماکہ ہونے سے ظاہر ہوتا ہے کہ یہ احتیاطی اقدامات ناکافی تھے۔ اس خونی گھات کے جواب میں صہیونی وزیر اعظم بنیامین نیتن یاہو نے کہا کہ اسرائیل نے بہت مشکل دن گزارا ہے، اور میں ہلاک ہونے والے فوجیوں کے اہل خانہ سے تعزیت کرتا ہوں، جو یرغمالیوں کی واپسی اور اسرائیلیوں کی حفاظت کے لیے جان سے گئے۔