حیدرآباد میں مجلس عزا پر شرپسندوں کا حملہ

حیدرآباد : حیدرآباد کے علاقے پھلیلی میں توہین صحابہ کا پروپیگینڈا کرکے شرپسندوں نے فضل ٹاؤن میں مجلس پر دھاوا بول دیا، پتھراؤ کیا اور عزاداروں کو زدوکوب کرکے سبیل کو آگ لگادی، اطلاع ملتے ہی پولیس کی بھاری نفری اور رینجرز جائے وقوعہ پر پہنچ گئی، پولیس نے شرپسندوں کو منتشر کرنے کیلئے شینلنگ اور ہوائی فائرنگ کی، کالعدم تنظیموں سے منسلک سوشل میڈیا پیجز سے کھلے عام توہین صحابہ کا پروپیگینڈا کیا گیا جس سے اشتعال پھیلا اور شہر بھرمیں دونوں کالعدم جماعتوں کے شرپسند سٹرکوں پر نکل آئے ، شیعہ کافر کے نعرے لگائے اور سر عام بھاری اور خودکار اسلحے سے شدید فائرنگ کی، سیکیورٹی ادارے شرپسندوں کے سامنے بے بس دکھائی دئے، شرپسندوں نے جگہ جگہ نجی املاک پر حملہ کرکے توڑ پھوڑ کی جبکہ ٹائروں کو آگ لگا کر سڑکیں بلاک کردیں، تھانہ پنیاری کی حدودبھٹی گوٹھ پھاٹک سےشروع ہونے والی کشیدگی نے شہر کے مختلف علاقوں کو اپنی لپیٹ میں لے لیا ، کالعدم جماعتوں نے آج شہر میں ہڑتال کی کال دی ہے، ایس ایس پی حیدرآباد عبدالسلام شیخ اور ڈی سی فواد سومرو نے صورتحال کو معمول پر لانے کیلئے دونوں جانب کے علما سے مذاکرات کئے، ڈی سی کا کہنا ہے کہ حالات کشیدہ لیکن کنٹرول میں ہیں، سوشل میڈیا کے ذریعے فسادات کی آگ بھڑکائی جارہی ہے، انجمن امامیہ سندھ نے انتظامیہ سے مجلس پر حملہ کرنے والوں کیخلاف کارروائی کا مطالبہ کیا ہے۔