Raza Musani 
رام اللہ : فلسطین کے اسرائیل نواز صدر محمود عباس نے غزہ میں لوگوں کو بھوک سے مرنے کے جرم کو روکنے کے لیے وسیع بین الاقوامی رابطہ مہم شروع کردی ہے۔ محمود عباس نے فلسطینی عوام پر مسلط کردہ فاقہ کشی کے جرائم پر خبردار کرتے ہوئے کہاکہ یہ جنگی جرم ہے جس کی پوری ذمہ داری اسرائیلی قابضین پر عائد ہوتی ہے۔
عالمی رہنماؤں اور بین الاقوامی تنظیموں کے نام پیغامات میں محمود عباس نے لکھاکہ اسرائیلی غاصب حکومت غزہ میں نسل کشی، قتل، تباہی اور بھوک سے مرنے کے جرائم بغیر کسی روک ٹوک اور جوابدہی کے کر رہی ہے۔ محمود عباس نے لکھا کہ یہ اقدامات دو ریاستی حل کو نقصان پہنچاتے ہیں۔ اوراس کا مقصد ایک آزاد اور خودمختار فلسطینی ریاست کے قیام کو روکنا ہے۔ فلسطینی صدر نے کہاکہ جس زمانے میں ہم رہ رہے ہیں وہ انتہائی نازک ہے اور اس کے لیے آزاد دنیا کو کھڑا ہونا چاہیے اور قتل، فاقہ کشی اور ناکہ بندی کے ذریعے ہونے والی نسل کشی کو روکنا چاہیے۔
