میڈرڈ گروپ کا غزہ کا محاصرہ ختم کرنے اورامداد کی فراہمی کا مطالبہ

میڈرڈ : سعودی زیر قیادت میڈرڈ گروپ نے اسرائیل سے غزہ کا محاصرہ فوری ختم کرنے اور امداد کی فراہمی کا مطالبہ کیا ہے۔ اسپین کے دارالحکومت میڈرڈ میں منعقدہ اجلاس میں غزہ اور مغربی کنارے کی تازہ ترین صورتحال اور جنگ روکنے اور انسانی بحران کے خاتمے کے لیے بین الاقوامی کوششوں کا جائزہ لیا گیا۔ اجلاس میں فلسطینی مسئلے کے پرامن حل اور دو ریاستی فارمولے پر عمل درآمد کے لیے آئندہ ماہ جون میں ہونیوالی بین الاقوامی کانفرنس کی تیاریوں پر بھی غور کیا گیا۔ اجلاس کے بعد جاری اعلامیہ میں زور دیا گیا ہے کہ غزہ کے شہریوں کی ضروریات پوری کرنے کیلئے انسانی، امدادی اور طبی امداد کی فراہمی یقینی بنائی جائے۔ اجلاس کے شرکا نے دو ریاستی حل پر عملدرآمد کو نا گزیر قرار دیا جو متعلقہ بین الاقوامی قراردادوں کی بنیاد پر ہو۔