لاس اینجلس، تارکین اور پولیس میں جھڑپیں، 100 سے زائد گرفتار

لاس اینجلس : امریکی شہر لاس اینجلس میں تارکین وطن کیخلاف کریک ڈاؤن پر جاری احتجاج شدت اختیار کرگیا۔ لاس اینجلس کے علاقے پیراماؤنٹ میں تیسرے دن بھی مظاہرین اور پولیس کے درمیان جھڑپیں ہوئیں۔ چند مظاہرین نے میکسیکو کے جھنڈے اٹھا رکھے تھے۔ پولیس نے مظاہرین کو منتشر کرنے کیلئے شیلنگ کی اور ربڑ کی گولیاں چلائیں۔ مظاہرین نے کئی گاڑیوں کو آگ لگادی۔ پولیس نے سو سے زائد مظاہرین کو گرفتار کرلیا۔ کیلیفورنیا کے گورنر گیون نیوسم نے نیشنل گارڈز کی تعیناتی کو جان بوجھ کر اشتعال دلانے والا قرار دیا۔ انہوں نے کہا کہ نیشنل گارڈ کی تعیناتی غیر قانونی اورغیر اخلاقی ہے وہ ٹرمپ انتظامیہ کے خلاف مقدمہ دائر کریں گے۔ ٹرمپ نے اپنے فیصلے کا دفاع کرتے ہوئے کہا ہے کہ ضرورت پڑی تو وہ فوج بھیجنے کو بھی تیار ہیں۔