Raza Musani 
طرابلس: لیبیا میں متحارب گروپوں کے درمیان لڑائی میں 55 افراد ہلاک اور ڈیڑھ سو کے قریب زخمی ہوگئے۔ دارالحکومت طرابلس میں 444 بریگیڈ کے کمانڈر محمود حمزہ کی حراست سے جھڑپوں کا آغاز ہوا۔ جو کئی اضلاع تک پھیل گئیں۔ 444 بریگیڈ اور اسپیشل ڈیٹرنس فورس کے درمیان جھڑپوں میں ہلکے اور بھاری ہتھیاروں کا بھرپور استعمال کیا گیا۔ شہری اپنے گھروں میں محصور ہو گئے۔ ان جھڑپوں کو کئی برسوں کی مہلک ترین جھڑپیں بتایا جا رہا ہے۔ لڑائی کی وجہ بننے والے کمانڈر کو اسپیشل ڈیٹرنس فورس نے رہا کر دیا۔ دونوں مسلح گروہ 2011 میں طویل عرصے سے حکمران معمر قذافی کی معزولی کے بعد سے اقتدار کے لیے لڑ رہے ہیں۔ اقوام متحدہ کے امدادی مشن نے لڑائی پر تشویش کا اظہار کرتے ہوئے فوری کشیدگی اور مسلح جھڑپوں کے خاتمے کا مطالبہ کیا ہے۔ مشن نے کہاکہ تمام فریقوں کو حالیہ برسوں میں حاصل کی گئی سلامتی کی کامیابیوں کو برقرار رکھنا چاہیے اور بات چیت کے ذریعے اختلافات کو حل کرنا چاہیے۔
