کرم اس وقت انسانی المیہ سے گزر رہا ہے، علامہ ساجد علی نقوی

راولپنڈی : شیعہ علما کونسل کے سربراہ علامہ سید ساجد علی نقوی سے انجمن حسینیہ کے سیکرٹری جلال حسین بنگش، ممبر صوبائی اسمبلی علی ہادی، سابق سیکرٹری انجمن حسینیہ حاجی سردار حسین اور حاجی نذیر حسین نے ملاقات کی۔ اس موقع پر شیعہ علماء کونسل پاکستان کے مرکزی سیکرٹری جنرل علامہ ڈاکٹر شبیر حسن میثمی اور مرکزی سیکرٹری اطلاعات زاہد علی آخونزادہ بھی موجود تھے۔ کرم کے عمائدین نے قائد محترم کو علاقائی صورتحال اور راستوں کی بندش سے کرم میں پیدا ہونے والے انسانی المیہ اور ادویات کے ناپید ہونے کے باعث معصوم بچوں کی پے در پے شہادتوں کے واقعات سے آگاہ کیا۔ اس صورتحال پر علامہ نے رنج و غم کا اظہار کیا اور شہداء کے لیے فاتحہ خوانی کی۔ انہوں نے غمزدہ خاندان کو تعزیت و تسلیت پیش کرتے ہوئے اہل کرم کے مسائل بالخصوص راستوں کو کھولنے کے حوالے وفد کی رہنمائی بھی کی۔ انہوں نے کہا کہ کرم اس وقت انسانی المیہ سے گزر رہا ہے، لہذا عوام کو بنیادی ضروریات زندگی بالخصوص طبی امداد باہم پہنچانے کے لیے حکمرانوں کو ترجیحی اقدامات اٹھانے چاہیئے۔