صحافی شیریں ابو عاقلہ اسرائیلی فوج کی گولی سے ہلاک ہوئیں، رپورٹ میں اعتراف

تل ابیب: صیہونی فوج نے پہلی بار اعتراف کیا ہے کہ فلسطینی صحافی شیریں ابو عاقلہ ان کے فوجی کی فائرنگ سے ہلاک ہوئی۔ فلسطینی صحافی شیریں ابو عاقلہ کے قتل پر اسرائیلی فوج کی حتمی تحقیقاتی رپورٹ میں کہا گیا ہے کہ شیریں عاقلہ کے حادثاتی طور پر اسرائیلی فوجی کی گولی کا نشانہ بننے کا امکان ہے۔ اسرائیلی فوجی نے مشتبہ فلسطینی مسلح افراد پر فائرنگ کی تھی۔ رپورٹ کے مطابق اسرائیلی فوجی شیریں ابو عاقلہ کے صحافی ہونے کی شناخت نہیں کرسکا۔ واضح رہے کہ اس سے قبل اسرائیلی فوج نے شیریں عاقلہ کے قتل کا ذمہ دار فسلطینی عسکریت پسندوں کو ٹھہرایا تھا۔ اسرائیلی فوج کا یہ بیان اب تک شیریں ابو عاقلہ کے قتل کے حوالے سے دیے گئے بیانات کے مقابلے میں ذمہ داری قبول کرنے کے قریب ترین ہے۔ تاہم قتل میں ملوث فوجیوں کے خلاف قانونی کارروائی کو مسترد کر دیا ہے اور واقعے کی تحقیقات کو یہیں ختم کرنے کا فیصلہ کیا گیا ہے۔