اسرائیلی پابندیوں سے فلسطینی معیشت اور صحت کا نظام تباہ ہوگیا، عالمی بینک

نیویارک: عالمی بینک نے کہا کہ فلسطینی علاقوں میں اسرائیلی پابندیوں سے معیشت اور صحت کا نظام تباہ ہوگیا ہے۔ رپورٹ میں کہا گیا ہے کہ مقبوضہ مغربی کنارے میں نقل و حرکت اور تجارت پر اسرائیلی پابندیاں، غزہ پرمسلط کردہ ناکہ بندی اور دونوں علاقوں کے درمیان تقسیم سمیت کئی عوامل نے فلسطینی معیشت کو انتہائی خطرے میں ڈال دیا ہے۔ رپورٹ کے مطابق پابندیاں اور بڑھتی ہوئی مالی رکاوٹیں فلسطینیوں کے معاشی حالات کو شدت سے متأثر کر رہی ہیں اور بروقت زندگی بچانے والی صحت کی نگہداشت تک ان کی رسائی میں رکاوٹ بن رہی ہیں۔ بیان میں کہا گیا ہے کہ ظاہری اور انتظامی رکاوٹوں کی وجہ سے کینسر، امراضِ قلب اور زچگی اور بچے کی پیدائش سے متعلقہ علاج کے لیے بیرونی طبی حوالوں تک رسائی نمایاں طور پر متأثر ہوتی ہے۔ عالمی بینک نے اسرائیلی اور فلسطینی حکام پر زور دیا کہ وہ ایسے طبی معاملات کو بہتر طریقے سے سنبھالیں اور مریضوں اور ان کے ساتھیوں کو بروقت طبی امداد فراہم کرنے کے لیے اجازت نامے کے عمل کو آسان بنائیں۔