اسرائیلی طیاروں کے غزہ پر حملے، 80 فلسطینی شہید، درجنوں زخمی

غزہ: جنگ میں سات روزہ وقفے کے بعد صیہونی فوج نے غزہ پر دوبارہ حملے شروع کردئے۔ حملوں میں اسی افراد شہید اور درجنوں زخمی ہوگئے۔ صیہونی جنگ طیاروں نے غزہ میں رفح ۔غزہ شہر ۔ خان یونس اور شجایا سمیت مختلف مقامات پر حملے کئے۔ بمباری اور میزائل حملوں میں رہائشی عمارتوں اور مکانات کو نشانہ بنایا گیا۔ اسرائیلی فوج نے کہا کہ شمالی غزہ میں حماس کے ٹھکانوں پر حملے کئے گئے ہیں۔ مغربی غزہ میں صیہونی فوجیوں اور مزاحمت کاروں میں شدید جھڑپیں ہورہی ہیں۔ صیہونی فوج البریج اور نصیرت کیمپ کے اطراف گولہ باری کررہی ہے۔
القسام بریگیڈ کا کہنا ہے کہ اس نے جنوبی اسرائیل کے شہروں اشکلون۔ سیدورت اور بیر شیبہ پر راکٹوں سے حملہ کیا۔ اس سے پہلے جنگ بندی معاہدے کے ساتویں اور آخری روز حماس نے آٹھ اسرائیلی یرغمالیوں اور اسرائیل نے 30 فلسطینی قیدیوں کو رہا کیا۔