Raza Musani 
غزہ: صیہونی فوج نے بھوک سے بے حال فلسطینیوں کے لیے امداد لے جانے والی ایک اور امدادی کشتی حنظلہ پر قبضہ کر لیا۔ فریڈم فلوٹیلا کولیشن کے تحت امدادی کشتی کو غزہ سے ستر ناٹیکل میل دور اسرائیلی بحری جہازوں اور ڈرونز نے گھیرلیا۔ اسرائیلی حکام نے پہلے ہی خبردار کر دیا تھا کہ اگر کشتی نے راستہ نہ بدلا تو کارروائی کی جائے گی۔
فریڈم فلوٹیلا کولیشن کی شیئر لائیو اسٹریم ویڈیو میں دیکھا گیا کہ کم از کم چھ اسرائیلی فوجی امدادی کشتی پر قبضہ کررہے ہیں۔ کچھ دیر بعد کشتی کی لائیو ویڈیو نشریات بھی بند ہو گئیں۔ جہاز پر یورپی پارلیمنٹ کی فرانسیسی رکن سمیت بارہ ممالک کے اکیس افراد سوار تھے جنہیں حراست میں لے لیا گیا۔
حنظلہ نامی امدادی جہاز اٹلی سے خوراک اور دوائیں لیکر روانہ ہوئی تھی۔ ٹائمز آف اسرائیل کے مطابق کشتی کو اشدود بندرگاہ تک لے جایا جائے گا، اور پھر کارکنوں کو ملک سے نکال دیا جائے گا۔
کشتی پر اسرائیلی قبضے کا یہ دوسرا واقعہ ہے۔ چالیس روز قبل بھی غزہ امداد لے جانے والی کشتی کو اسرائیلی فوج نے قبضے میں لے لیا تھا۔
