اسرائیلی فوج کے پاس غزہ پر قبضہ کیلئے افرادی قوت اور لاجسٹک وسائل کی کمی ہے، آرمی چیف

تل ابیب: اسرائیلی آرمی چیف ایال ضمیر نے انکشاف کیا ہے کہ غزہ پر قبضے کی منصوبہ بندی پر عمل درآمد کے لیے تقریباً دو لاکھ ریزرو فوجیوں کی ضرورت ہو گی۔ اسرائیلی سرکاری نشریاتی ادارے کان کے مطابق ایال ضمیر نے سیکورٹی کابینہ کے اجلاس میں کہا کہ منصوبے پر عملدرآمد کیلئے بڑے پیمانے پر لاجسٹک وسائل اور بنیادی ڈھانچے کی ضرورت ہے جس کی فوج کے پاس کمی ہے۔ انہوں نے مزید کہا کہ غزہ کے عام شہریوں کیلئے اسپتال قائم کرنے اور بڑی مقدار میں انسانی امداد پہنچانے کی ضرورت ہو گی۔ جو فوج فی الحال فراہم کرنےکی صلاحیت نہیں رکھتی۔ ضمیر کے مطابق اس وقت شہری آبادی کو منتقل کرنے کے لیے درکار سہولیات موجود نہیں۔ اس لیے اضافی اسپتال بنانے ہوں گے ۔ کان کے مطابق قومی سلامتی کے وزیر اتمار بن گوئر نے امداد کی فراہمی یا اسپتالوں کی تعمیر کی مخالفت کی تو ضمیر نے جواب دیا کہ تو پھر یرغمالیوں کی بازیابی کو جنگی مقاصد سے ہٹا دیا جائے۔