اسرائیل ٹھیک جا رہا ہے، اسے روکنا بہت مشکل ہے، امریکی صدر کا دعویٰ

واشنگٹن : امریکی صدر ڈونلڈ ٹرمپ نے اسرائیل کی مکمل حمایت کا اعادہ کرتے ہوئے دعویٰ کیا ہے کہ اسرائیل ٹھیک جا رہا ہے اس سے ایران پر حملے روکنے کی درخواست کرنا بہت مشکل ہے۔ امریکی صدر ٹرمپ نے میڈیا سے گفتگو میں قومی انٹیلیجنس کی ڈائریکٹر تلسی گیبارڈ کی رپورٹ کو غلط قرار دیا کہ ایران ایٹمی ہتھیار نہیں بنا رہا ہے۔ ٹرمپ نے ایک بار پھر الزام عائد کیا کہ تہران زیادہ سے زیادہ چند مہینوں میں جوہری ہتھیار حاصل کرنے کے قابل ہو جائے گا لیکن ہم ایسا ہونے نہیں دے سکتے۔ انہوں نے کہا کہ امریکا ایران سے مذاکرات کیلئے تیار اور رضامند ہے ۔ ایران سے بات چیت کر رہے ہیں، دیکھتے ہیں آگے کیا ہوتا ہے۔ ایران اور اسرائیل کے درمیان جنگ میں یورپ زیادہ مدد نہیں کر سکے گا۔ ٹرمپ نے کہا کہ انہوں نے ایران پر حملے سے متعلق فیصلہ کرنے کیلئے دو ہفتوں کا وقت دیا ہے اور وہ دو ہفتوں میں یہ فیصلہ کرلیں گے۔