اسرائیل کے 80 ڈرون گرائے، 32 کا ملبہ ایرانی افواج کے قبضے میں ہے، جنرل محسن رضائی

تہران : سپاہ پاسداران انقلاب اسلامی کے سابق سربراہ ریٹائرڈ جنرل محسن رضائی نے انکشاف کیا ہے کہ حالیہ جنگ کے دوران ایران نے اسرائیل کے تقریباً 80 ڈرونز کو مار گرایا ہے۔ جن میں سے 32 کا ملبہ ایرانی افواج کے قبضے میں ہے۔ ان میں صہیونی افواج کے انتہائی جدید اور پیشرفتہ ہرمیس اور ہرموین جیسے ڈرونز بھی شامل ہیں۔ انہوں نے بتایا کہ ایرانی ریڈار سسٹمز نے تمام طیاروں کو ہدف بنانے کے مناظر ریکارڈ کیے ہیں جو ایران کی دفاعی صلاحیتوں کا منہ بولتا ثبوت ہے۔ محسن رضائی نے میڈیا سے گفتگو میں مزید کہا کہ اس جنگ کے بعد اسرائیل اور امریکہ نے پروپیگنڈا مہم شروع کی تاکہ اپنی شکست پر پردہ ڈال سکیں۔ مگر حقیقت یہ ہے کہ اسرائیل کو نہ صرف عسکری محاذ پر بلکہ معاشی سطح پر بھی سنگین نقصان اٹھانا پڑا ہے۔انہوں نے انکشاف کیا کہ اسرائیلی وزارت خزانہ کی رپورٹ کے مطابق صرف 12 دنوں میں تل ابیب حکومت کو 20 ارب ڈالر کے اخراجات برداشت کرنا پڑے، جن میں دو سال کی مقدار کے امریکی ’تھاڈ‘ میزائلوں کا استعمال شامل ہے۔