اسرائیل شکست کی خفت مٹانے کے لیے نہتے عوام کا قتل عام کر رہا ہے، علامہ راجہ ناصر عباس

ملتان : مجلس وحدت مسلمین پاکستان کے زیراہتمام آزادی فلسطین مارچ علی چوک، ملتان سے شروع ہوا جو حسین آگاہی سے ہوتا ہوا گھنٹہ گھر چوک پر جلسے کی شکل اختیار کر گیا، علامہ راجہ ناصر عباس جعفری نے فلسطین مارچ کے شرکاء سے خطاب کرتے ہوئے کہا کہ اسرائیلی بزدل ہیں جو عام عوام کا قتل عام کر رہے ہیں، علامہ راجہ ناصر عباس جعفری نے کہا ہے کہ بزدل اسرائیل اپنی شکست کی خفت مٹانے کے لیے نہتے عوام کا قتل عام کر رہا ہے، ملتان کے غیور باسیوں نے فلسطینیوں کے ساتھ کھڑے ہونے کا حق ادا کر دیا ہے۔انہوں نے کہاکہ کہاں گئے انسانی حقوق؟ عورتوں بچوں کے حقوق۔؟ غزہ میں امریکا کے برطانیہ کے فوجی مارے جا رہے ہیں، پوری دنیا کے فرعون غزہ پر حملہ آور ہیں، خدا چاہتا ہے مظلومین ظلم کے مقابلے میں فریاد بلند کریں، اس وقت دو طرح کی جبگ جاری ہے ایک اسلحے کی اور ایک بیانیے کہ جنگ ہے، آپ نے بیانیے کی جنگ میں اسرائیل امریکہ کو شکست دے دی ہے، آج دنیا فلسطینیوں کے حق میں سراپا احتجاج ہے، خطہ اولیا اللہ کی سر زمین پر مظلومین فلسطین کے حق میں نکلنے والوں کو سلام پیش کرتا ہوں۔
مارچ سے جمعیت اہلحدیث کے سربراہ ضیاء اللہ شاہ بخاری، علامہ احمد اقبال رضوی، سید ناصر عباس شیرازی اور دیگر نے بھی خطاب کیا۔