اسرائیل غزہ میں اپنا کوئی بھی مقصد حاصل نہیں کرسکا، حماس

بیروت: حماس کے ترجمان اُسامہ حمدان نے کہا ہے کہ اسرائیل غزہ میں اپنا کوئی بھی مقصد حاصل نہیں کرسکا۔ بیروت میں پریس کانفرنس سے خطاب کرتے ہوئے اُسامہ حمدان نے کہاکہ اسرائیل غزہ میں عسکری اور سیاسی دونوں لحاظ سے بری طرح ناکام ہوا۔ اسرائیلی فوجی غزہ کی 80 فیصد سر زمین کو چھونے میں ناکام رہے۔ انہوں نےمزید کہاکہ زمینی کارروائی میں ہلاک اسرائیلی فوجیوں کی تعداد بتائی گئی تعداد سے کہیں زیادہ ہے۔ ایک ہزار سے زیادہ فوجی زخمی ہوئے ہیں۔ اُسامہ حمدان نے کہا کہ زخمی اسرائیلی فوجیوں میں 200 شدید زخمی ہیں۔ دشمن کا نقصان آنے والے دنوں میں مزید بڑھے گا۔ حماس کے ترجمان نے کہا کہ فلسطینی قیدیوں نے بتایا کہ اسرائیل کا رویہ کتنا وحشیانہ رہا۔اسرائیلی جیلوں میں فلسطینی قیدی نہ ہوتے تو ہمیں اسرائیلیوں کو یرغمالی بنانے کی ضرورت نہ ہوتی۔ عرب رہنما مسلم اور عرب ممالک اجلاس کی قراردادوں پر عمل کریں۔