اسرائیل نے جنگی جرائم کئے ہیں لیکن اس پر مقدمہ چلانا مشکل ہے، ایمنسٹی کا کڑوا سچ

لندن : انسانی حقوق کی عالمی تنظیم ایمنسٹی انٹرنیشنل نے صاف صاف کہہ دیا کہ اسرائیل نے غزہ میں جنگی جرائم کئے ہیں لیکن اس پر مقدمہ چلانا مشکل ہے۔ ایمنسٹی کے عہدیدار سامی عبدالمنعم نے کہا کہ شواہد موجود ہیں کہ اسرائیل نے غزہ میں جنگی جرائم کا ارتکاب کیا۔ اسکولوں اور اسپتالوں میں شہریوں کو بغیر کسی انتباہ کے براہ راست نشانہ بنایا گیا۔ تنظیم نے ابتدائی طور پر دو واقعات کو دستاویزی شکل دی ہے جس میں 20 بچوں سمیت 46 شہری مارے گئے۔ 19 اکتوبر کو ایک چرچ کو نشانہ بنایا جہاں سینکڑوں بے گھر شہری پناہ لیے ہوئے تھے۔ شواہد کے باجود اسرائیل پر بین الاقوامی عدالتوں میں مقدمہ چلانا مشکل ہے۔ کیونکہ اس نے فوجداری عدالت کو ریگولیٹ کرنے والے کنونشن پر دستخط نہیں کئے ہیں۔ سامی عبدالمنعم نے کہا کہ جنگوں میں اسرائیل کی تاریخ گواہ ہے کہ اس نے کبھی بین الاقوامی قانون میں طے شدہ اصولوں کا احترام نہیں کیا۔ عبادت گاہوں، اسکولوں، اسپتالوں، یا ایسی جگہوں کا احترام نہیں کیا جہاں عام اور بے گناہ شہری پناہ لے سکتے ہیں۔