اسرائیل نے انتظامی کمیٹی کو غزہ میں داخلے سے روک دیا

غزہ : رفح کراسنگ دوبارہ کھلنے کے باوجود اسرائیل نے فلسطینی ٹیکنوکریٹک کمیٹی کو غزہ میں داخل ہونے اور اپنے کام کا آغاز کرنے سے روک دیا۔ اسرائیلی اخبار ہاریٹز کے مطابق فلسطینی قومی کمیٹی برائے انتظام غزہ کے ارکان تین ہفتے قبل اپنی فہرست شائع ہونے کے باوجود مصر سے غزہ میں داخل نہیں ہو سکے۔ فلسطینی اور عرب حکام کا کہنا ہے کہ اسرائیل کی جانب سے ارکان کی آمد پر پابندی کمیٹی کے کام کے آغاز میں تاخیر کی بنیادی وجہ ہے ۔تمام ارکان اس وقت مصر میں ہیں اور یہ ابھی واضح نہیں کہ انہیں کب داخلے کی اجازت ملے گی اور آیا اسرائیل تمام ارکان کو داخل ہونے دے گا یا نہیں۔ کمیٹی کے ارکان کا کہنا ہے کہ انہیں اپنی حفاظت اور کام کی بحالی کے حوالے سے شدید تشویش ہے۔ خدشہ ہے کہ اسرائیل کے حمایتی گروہ کمیٹی کے کام میں رکاوٹ ڈال سکتے ہیں۔ فلسطینی ذرائع غزہ میں کراسنگ کے کھلنے کو صرف علامتی اقدام قرار دیتے ہیں۔ کمیٹی کے پاس غزہ میں انتظامی ڈھانچہ، فنڈنگ، زمین پر انتظامی یا حفاظتی کنٹرول اور مختلف ایجنسیوں کے ساتھ ہم آہنگی کی سہولت بھی موجود نہیں ہے۔