Raza Musani 
تل ابیب : اسرائیل نے بڑھتے ہوئے عالمی دباؤ کی وجہ سے غزہ میں پیراشوٹ کے ذریعے امداد گرانے کی اجازت دے دی۔ اسرائیلی حکام نے کہا ہے کہ اردن اور عرب امارات گذشتہ سال کی طرح غزہ میں غذائی امداد ہوائی جہازوں کے ذریعے گرا سکتے ہیں۔ اسرائیلی حکام کے مطابق اردن پہلا ایئر ڈراپ کرنےکے لیے تیارہے۔
ادھر برطانوی وزیراعظم سر کیر اسٹارمر نے تجویز دی ہے کہ برطانیہ غزہ میں فضائی راستے سے امداد بھیجنے میں کردار ادا کرے گا۔ اسٹارمر نے اخبار دی مرر میں لکھا کہ یہ خبر کہ اسرائیل ممالک کو غزہ میں امداد بھیجنے کی اجازت دے گا حالانکہ بہت دیر ہو چکی ہے لیکن ہم اس راستے سے امداد پہنچانے کے لیے ہر ممکن کوشش کریں گے۔ انہوں نے کہا کہ برطانیہ ان بچوں کو نکالنے کے لیے بھی فوری طور پر کوششیں تیز کر رہا ہے جنہیں علاج کے لیے برطانیہ منتقل کرنے کی ضرورت ہے۔
