ایران اپنے خلاف پابندیوں سے جھکے گا نہیں، مسعود پزشکیان

تہران: ایران کے صدر مسعود پزشکیان نے کہا ہے کہ ملک کو جھکانے اور ذلیل کرنے کی دشمنوں کی کوششیں محض ایک خواب ہیں۔ ایران کبھی گھٹنے نہیں ٹیکے گا۔
صدر پزشکیان نے ایک بیان میں کہا کہ ایران کے خلاف پابندیوں کی دھمکیاں اور دباؤ صرف اس لیے ہیں کہ ایران سر جھکانے پر تیار نہیں۔ انہوں نے کہا کہ دشمن چاہتے ہیں ایران ذلت قبول کرے لیکن ایسا سوچنا بھی ناممکن ہے۔ انہوں نے زور دیا کہ حکومت پوری طاقت کے ساتھ عوام کی عزت اور مسائل کے حل کے لیے وسائل بروئے کار لائے گی۔ پزشکیان نے یاد دلایا کہ جون میں امریکہ-اسرائیل جنگ کے بارہ دنوں کے دوران ایرانی عوام کے اتحاد نے دشمنوں کی تمام توقعات غلط ثابت کر دیں۔ انہوں نے امریکہ اور یورپ کو تنقید کا نشانہ بناتے ہوئے کہا کہ یہ انسانی حقوق اور جمہوریت کی بات کرتے ہیں لیکن غزہ میں ہونے والے قتلِ عام پر خاموش ہیں، جبکہ اسرائیل جس ملک پر چاہے حملہ کرتا ہے اور سلامتی کونسل میں امریکی ویٹو کے باعث اسے کبھی سزا نہیں ملتی۔