جدید ٹیکنالوجی کے میدان میں ایران روس تعاون کا یوکرین جنگ سے کوئی تعلق نہیں، ترجمان

تہران : ایران نے امریکی قومی سلامتی کے مشیر جیک سالیوان کا روس کو سینکڑوں ڈرون طیارے فراہم کرنے کے دعویٰ پر شدید ردعمل ظاہر کیا ہے۔ وزارت خارجہ کے ترجمان ناصر کنعانی نے کہا کہ جدید ترین ٹیکنالوجی کے میدان میں ایران روس تعاون کا جنگ یوکرین سے کوئی تعلق نہیں۔ یہ تعاون جنگ یوکرین سے بہت پہلے سے جاری ہے اور حالیہ دنوں میں اس میں کوئی خاص تبدیلی نہیں آئی۔ ترجمان نے مزید کہا کہ امریکی مشیر نے یہ دعوی ایسے وقت کیا ہے جب امریکا اور یورپ نے خطے میں اپنے تیار کردہ ہلاکت خیز ہتھیاروں کے انبار لگا رکھے ہیں۔ ہم یہ بات پوری جرأت کے ساتھ کہہ سکتے ہیں کہ اگر امریکا اور مغربی ممالک طرح طرح کے ہتھیار فراہم نہ کرتے تو اسرائیل پچھلے سات عشروں کے دوران سرزمین فلسطین میں جارحیت، جرائم اور غاصبانہ قبضہ جاری نہیں رکھ سکتا تھا۔ جیک سالیوان نے دعوی کیا تھا کہ ایران عنقریب روس کو سینکڑوں ڈرون طیارے فراہم کرے گا جو بقول ان کے جنگ یوکرین میں استعمال کیے جائیں گے۔