Raza Musani 
تہران: دنیا کے نقشے سے خلیج فارس کا نام مسخ کرنے کی کوشش پر ایران نے گوگل کے خلاف قانونی کارروائی کا اعلان کردیا۔ ایرانی مرکز برائے سائبر اسپیس کے نائب سربراہ محمد صادق فَرَہانی نے ایک تقریب سے خطاب میں کہا کہ گوگل کی جانب سے خلیج فارس کے تاریخی نام میں تحریف ایران کی ثقافتی شناخت پر حملہ ہے۔ بطور ادارہ ایران کی تہذیبی وتاریخی شناخت کا تحفظ ہماری ذمہ داری ہے۔ فَرَہانی کے مطابق نام کی تبدیلی کے حوالے سے تین مراحل میں اقدامات کیے جائیں گے۔ پہلے مرحلے میں بین الاقوامی تنظیموں میں باقاعدہ احتجاج کیا جائے گا۔ اگلے مرحلے میں عالمی عدالتوں اور ثالثی ٹربیونلز میں مقدمات کی پیروی کی جائے گی۔ اس کے بعد ایرانی وزارت خارجہ اور عدلیہ کے تعاون سے ملک کی اندرونی عدالتوں میں شکایت درج کی جائے گی۔
