ایران اور امریکا قیدیوں کے تبادلے اور ایرانی فنڈز کے اجراء کے معاہدے کے قریب

تہران : مختلف ذرائع ابلاغ میں ایران کے اثاثے غیر منجمد کرنے پر امریکی قیدیوں کی رہائی کے معاہدہ کی خبروں پر ایرانی وزارت خارجہ نے اپنے بیان میں کہاہے کہ ایران اور امریکہ قیدیوں کے تبادلے کے معاہدے کے نزدیک ہیں جس میں ایرانی فنڈز کا اجرا بھی شامل ہے۔
امریکی اخبار نیویارک ٹائمز نے رپورٹ دی ہے کہ ممکنہ معاہدے کے تحت امریکی انتظامیہ بعض ایرانی شہریوں کو رہا کرے گی جو ایران پر پابندیوں کی خلاف ورزی پر جیل کی سزا کاٹ رہے ہیں۔ امریکا جنوبی کوریا میں ایران کے چھ ارب ڈالر کے اثاثوں کو بھی غیر منجمد کر دے گا اور اسے قطر کے مرکزی بینک میں منتقل کرےگا۔ ایرانی وزارت خارجہ نے تصدیق کی کہ جنوبی کوریا میں منجمد چھ ارب ڈالر کے اجرا کا عمل جاری ہے۔ ارنا نیوز ایجنسی نے رپورٹ دی ہے کہ امریکا عراق میں منجمد ایران کے چار ارب ڈالر بھی غیر منجمد کرے گا۔ امریکی وزیر خارجہ انٹونی بلنکن نے کہا ہے کہ ایران میں قید امریکیوں کی جیل سے رہائی ایک مثبت قدم ہے تاہم تہران کو قیدیوں کے معاہدے کے تحت پابندیوں میں کوئی ریلیف نہیں ملے گا۔