Raza Musani 
نئی دہلی: ہندوستان کی قومی تحقیقاتی ایجنسی این آئی اے نے علیحدگی پسند سکھ رہنما اور کینیڈا میں قتل کئے گئے ہردیپ سنگھ نجار کے قریبی ساتھی گروپتونت سنگھ پنوں کی جائیدادیں ضبط کرلیں۔ گروپتونت سنگھ پنوں کینیڈا میں مقیم ہیں اور انہیں ہندوستانی حکام نے 2020 میں دہشت گرد قرار دیا تھا۔ این آئی اے کے اہلکاروں نے چندی گڑھ میں گروپتونت سنگھ کے گھر کو ضبط کر لیا۔ جبکہ امرتسر میں ان کی زرعی اراضی بھی قبضے میں لے لی۔ گروپتونت سنگھ امریکہ میں قائم گروپ سکھ فار جسٹس کے بانی ہیں جس کی کینیڈا میں شاخ کے قیادت ہردیپ سنگھ کر رہے تھے۔ یہ گروپ سکھوں کے لیے آزاد وطن کی تحریک خالصتان کا حامی ہے۔ گروپتونت سنگھ نے ہردیپ سنگھ کے قتل کے بعد ویڈیو بیان میں کینیڈین ہندوؤں کو ہندوستان واپس جانے کے لیے کہا تھا اور یہ دعویٰ کیا گیا تھا کہ انہوں نے نئی دہلی کا ساتھ دے کر جنگی نقطہ نظر اپنایا ہے۔
