قیدی تبادلے کا تیسرا دور، 13 اسرائیلی، 4 غیر ملکی اور 39 فلسطینی رہا

غزہ: قیدیوں کے تبادلے کے تیسرے دور میں حماس نے تیرا اسرائیلی اور 4 غیر ملکی آزاد کردئے جبکہ اسرائیل نے انتالیس فلسطینیوں کو رہا کردیا۔ حماس نے اتوار کی رات 13 اسرائیلی یرغمالیوں کو رہا کیا جس میں ایک دُہری شہریت والی چار سالہ امریکی بچی بھی شامل ہے۔ حماس نے غیر سگالی کے تحت 3 تھائی شہریوں اور ایک دُہری شہریت کے حامل روسی شہری کو بھی رہا کیا۔ تمام یرغمالیوں کو ریڈ کراس کے حوالے کیاگیا۔ عالمی ریڈ کراس کمیٹی نے17 یرغمالیوں کی غزہ سےمصر منتقلی کی تصدیق کردی۔ تیرا اسرائیلی یرغمالیوں میں 9 بچے شامل ہیں۔ بدلے میں اسرائیل نے جیلوں میں قید 39 فلسطینی رہا کردئیے۔ تین روز میں حماس 39 اسرائیلی یرغمالیوں کو رہا کر چکی ہے جبکہ 117 فلسطینی قیدی رہائی پاکر مغربی کنارے پہنچ گئے ہیں۔ حماس نے کہا کہ غزہ جنگ پر روسی مؤقف کو سراہتے ہیں۔ روسی شہری کی رہائی روسی مؤقف کی وجہ سے کی۔