صیہونی فوج نے غزہ میں قدم رکھا تو مزاحمت اسے کچل دے گی، حماس

غزہ : القسام بریگیڈ کے ترجمان ابو عبیدہ نے خبردار کیا ہے کہ اگر اسرائیلی غزہ میں داخل ہونے کی جرات کرتے ہیں تو وہ اسکو مکمل طور پر کچل دینگے۔ القسام بریگیڈز کے ترجمان نے ایک عوامی خطاب کیا جس کے دوران انہوں نے آپریشن الاقصیٰ طوفان کی روشنی میں تازہ ترین واقعات اور پیش رفت پر تبصرہ کیا۔ اس بات پر زور دیا کہ موجودہ جنگ، آپریشن الاقصیٰ طوفان، وہیں سے شروع ہوئی جہاں سے 2021 کی آخری بڑی جنگ سیف القدس رکی تھی۔ اس جنگ میں ہم نے اس سے کہیں زیادہ کامیابی حاصل کی جس کا یقین اور منصوبہ بندی کی تھی، اور مزاحمت کے محور کے ساتھ ہم آہنگی کی رفتار میں اضافہ اور ترقی ہوئی ہے جب بات جنگ، دشمن کے خلاف جدوجہد اور مستقبل کی ہو۔ ابو عبیدہ نے زور دیا کہ آپریشن الاقصیٰ طوفان جب شروع ہوا، آپریشن کے علاقے، زمین اور موسم اور ان کے اثرات کے تجزیہ پر مبنی تھا۔ قیادت اس مقصد کو ذہن میں رکھتے ہوئے چوبیس گھنٹے انتھک کام کر رہی تھی. فوجی ترجمان نے انکشاف کیا کہ آپریشن الاقصیٰ طوفان میں مزاحمت نے 3500 راکٹ اور توپ خانے کے گولے داغے گئے۔ ہم نے 15 مقامات کو تباہ کیا اور مزید 10 سائٹس کو معاون فورسز کے لیے ہموار کیا۔ انہوں نے کہا کہ ہم آپریشن الاقصیٰ طوفان سے پہلے اپنے ارادوں، فوجی مشقوں اور چالوں کو چھپانے کے خواہشمند تھے۔ ہم نے اپنی افواج کو تربیت دینے اور انہیں اپنے کاموں کو مؤثر طریقے سے انجام دینے کے قابل بنانے کے لیے وسیع منصوبے بنائے۔ ابو عبیدہ نے مزید کہا کہ فلسطینی مزاحمت 2022 کے اوائل سے اسرائیلی قبضے کو اسٹریٹجک طور پر چکما دے رہی ہے۔ انہوں نے کہاکہ دشمن معصوم شہریوں کے خلاف ہولناک جرائم کا ارتکاب کر رہا ہے، اور اس کی قیادت کو جوابدہ بنانا ہماری ترجیح ہے۔ ترجمان نے مزید کہا کہ جنگ ہمارے کنٹرول میں ہے، اور ہم دفاعی لحاظ سے اپنی تیاریوں کو واضح کرتے ہیں۔ ہمارا فوجی انفراسٹرکچر اور اسلحہ ہمیں موثر طریقے سے اپنا دفاع کرنے کے قابل بناتا ہے۔