اسرائیل نے لبنان پر حملہ کیا تو بہت مار کھائے گا، امریکی اخبار

واشنگٹن : امریکی اخبار واشنگٹن پوسٹ نے صیہونی فوج کو خبردار کیا ہے کہ اگر اس نے لبنان پر حملے کی کوشش کی تو اسے حزب اللہ کی طرف سے شدید مزاحمت کا سامنا کرنا پڑے گا۔حزب اللہ کے پاس اسرائیل مخالف مزاحمتی گروہوں میں سب سے زیادہ گولہ بارود موجود ہے۔ واشنگٹن پوسٹ کے مطابق حزب اللہ کے پاس ایک لاکھ ساٹھ ہزار آرٹلری۔ بیلسٹک اور اینٹی شپ میزائل اور راکٹ موجود ہیں۔ جبکہ ایک لاکھ سے زائد انتہائی تربیت یافتہ مزاحمت کار مرنے مارنے پر تیار ہیں. اور صیہونی فوج پر غلبے کی صلاحیت رکھتے ہیں۔امریکی اخبار کے مطابق حزب اللہ کے حملوں کے سامنے اسرائیل کا آئرن ڈوم سسٹم مکمل طور پر ناکام ہوسکتا ہے۔ حزب اللہ کے پاس ایک سو پچیاسی میل دور تک دشمن کی تنصیبات کو نشانہ بنانے والے بیلسٹک میزائل موجود ہیں۔ یہ میزائل اسرائیلی دارالحکومت تل ابیب کو بھی نشانہ بنانے کی صلاحیت رکھتے ہیں۔