Raza Musani 
تہران: ایرانی وزیر خارجہ حسین امیر عبداللہیان نے خبردار کیا ہے کہ اگر امریکا نے اسرائیل کی ہرممکن حمایت جاری رکھی تو جنگ کے نئے محاذ کھل جائیں گے۔ حسین امیر عبداللہیان نے بلومبرگ ٹیلی ویژن کے ساتھ انٹرویو میں کہاکہ اگر اسرائیلی جنگ بند نہیں کرتے اور قتل و غارت گری اور نسل کشی جاری رکھتے ہیں تو نئے محاذوں کا آغاز ناگزیر ہو جائے گا اور یہ اسرائیل کو ایک نئی صورت حال میں ڈال دے گا جس سے اسے اپنے کیے پر پچھتاوا ہوگا۔ انہوں نےکہا کہ اسرائیل کیلئے امریکا کی غیرمشروط حمایت نے حماس کے خلاف حکومت کی جنگ اور عام شہریوں بالخصوص خواتین اور بچوں کے قتل میں اضافہ کیا ہے۔ انہوں نے امریکہ کے دُہرے معیار کی طرف اشارہ کرتے ہوئے کہا کہ امریکہ دوسروں کو تحمل کا مظاہرہ کرنے کا مشورہ دے رہا ہے لیکن اس نے خود پوری طرح اسرائیل کا ساتھ دیا ہے جسے بین الاقوامی قانون نے قابض طاقت قرار دیا ہے۔
