حزب اللہ نے اسرائیل سے محاذ آرائی روکنے کیلئے امریکی تعاون کی پیشکش مسترد کی تھی

بیروت : حزب اللہ نے اسرائیل کے ساتھ محاذ آرائی روکنے کے لیے امریکی تعاون کی پیشکش کو مسترد کر دیا۔ یہ انکشاف حزب اللہ کے سربراہ سید حسن نصراللہ کے 20 سال پرانے انٹرویو میں ہوا ہے یہ انٹرویو رواں ہفتے نشر کیا گیا۔ حسن نصراللہ نے کہا کہ مزاحمتی تحریک نے عرب اسرائیل تنازع میں خاتمے کیلئے امریکا کی رقم اور حمایت کی پیشکشوں کو مسترد کر دیا۔
حسن نصراللہ کا کہنا ہے کہ 2000 میں جنوبی لبنان اور مغربی بیکا کی آزادی کے بعد امریکا نے حزب اللہ کو کئی پیشکشیں کیں، جن کا مقصد تحریک کو غیر جانبدار بنانا اور اسے عرب اسرائیل تنازع کی مساوات سے ختم کرنا تھا۔ سید حسن نصراللہ نے کہا کہ امریکا حزب اللہ کو قائل کرنے کی کوشش کر رہا تھا کہ شیبا فارمز تنازعہ کے قابل نہیں ہیں اور یہ مسئلہ بات چیت کے ذریعے حل کیا جا سکتا ہے۔ امریکا نے کہا کہ حزب اللہ فلسطینی انتفاضہ کے لیے اپنی عسکری اور مالی حمایت ترک کردے۔