ایران پر حملہ ہوا تو پورے خطے کو آگ لگ جائے گی، سربراہ حزب اللہ

بیروت : حزب اللہ کے سربراہ شیخ نعیم قاسم نے خبردار کیا ہے کہ ایران پر حملہ ہوا تو جنگ میں سب شامل ہوں گے۔ اور پورے خطے کو آگ لگ جائے گی۔ لبنان کے مختلف علاقوں میں ایران سے اظہارِ یکجہتی کے اجتماعات سے خطاب کرتے ہوئے شیخ نعیم قاسم نے کہا کہ امریکا کے صدر ڈونلڈ ٹرمپ یا کسی اور کی جانب سے آیت اللہ سید علی خامنہ ای کو دی جانے والی دھمکیاں ناقابلِ قبول ہیں۔ رہبر آیت اللہ سید علی خامنہ ای کے خلاف کسی بھی دھمکی پر حزب اللہ خاموش نہیں رہ سکتی۔ ان کا کہنا تھا کہ ایسی کسی بھی دھمکی کا مقابلہ کرنا فرض ہے اور حزب اللہ اس کے لیے تمام ضروری اقدامات کرنے کی صلاحیت رکھتی ہے۔ شیخ نعیم قاسم نے خبردار کیا کہ اگر آیت اللہ خامنہ ای کو نقصان پہنچا تو یہ خطے اور دنیا کے استحکام پر حملہ تصور ہوگا۔ انہوں نے کہا کہ یہ دھمکیاں صرف ایک شخصیت کے خلاف نہیں بلکہ کروڑوں پیروکاروں اور عالمی امن کے لیے خطرہ ہیں۔حزب اللہ کے سربراہ نے متنبہ کیا کہ ایران کے خلاف کسی بھی جنگ کی صورت میں پورا خطہ آگ کی لپیٹ میں آ سکتا ہے۔ انہوں نے اس خطرے کو حزب اللہ کے لیے براہِ راست چیلنج قرار دیتے ہوئے کہا کہ جماعت کو ہر ممکن اقدام کا مکمل اختیار حاصل ہے۔ شیخ نعیم قاسم کے مطابق گزشتہ دو ماہ سے مختلف فریقین یہ سوال کر رہے ہیں کہ اگر امریکا اور اسرائیل کی ایران سے جنگ ہوئی تو حزب اللہ کیا کرے گی، جس کا فیصلہ حالات کے مطابق مناسب وقت پر کیا جائے گا۔