سری نگر کے مصروف بازار میں دستی بم حملہ، 12 افراد زخمی

سری نگر: مقبوضہ کشمیر کے دارالحکومت سری نگر کے ایک مصروف بازار میں دستی بم کے حملے میں بارہ افراد زخمی ہوگئے۔ میڈیا رپورٹس کے مطابق سری نگر کے اتوار بازار میں اس وقت دستی بم پھینکا گیا جب لوگوں کی بڑی تعداد خریداری میں مصروف تھی۔ پولیس کا کہنا ہے کہ آٹھ مردوں اور ایک عورت کو شری مہاراج ہری سنگھ اسپتال پنچایا گیا ۔تمام زخمیوں کی حالت بہتر ہے۔ وزیراعلٰی عمر عبداللہ نے ایک بیان میں کہا کہ دکان داروں پر گرنیڈ حملہ انتہائی پریشان کن ہے۔معصوم شہریوں کو نشانہ بنانے کا کوئی جواز نہیں ہو سکتا۔ عمر عبداللہ نے اپنے بیان میں مزید کہا کہ سیکیورٹی اداروں کو حملوں کی اس تیزی کو جلد از جلد ختم کرنے کے لیے ہر ممکن کوشش کرنی چاہیے تاکہ لوگ بغیر کسی خوف کے اپنی زندگی گزار سکیں۔