امریکی تجاویز اسرائیلی موقف کی عکاس، حماس نے مسترد کردیں

دوحہ : حماس نے جنگ بندی کی امریکی تجاویز کو اسرائیلی موقف کی عکاس قرار دیتے ہوئے مسترد کردیا۔ جبکہ صیہونی حکومت نے اسے قبول کرلیا ہے۔ حماس کے سینیئر رہنما سمیع ابوزہری نے نیوز ایجنسی رائٹرکو بتایا کہ امریکی تجاویز کا مطلب قتل اور قحط کو جاری رکھنا ہے۔ اس میں جنگ ختم کرنے، اسرائیلی فوجوں کے انخلا اور امداد کو آزادانہ طور پر غزہ میں داخل ہونے کی اجازت دینے کے وعدے شامل نہیں ہیں۔ حماس کے سیاسی بیورو کے رکن باسم نعیم نے بتایا کہ یہ معاہدہ ہمارے لوگوں کے کسی بھی مطالبے کو پورا نہیں کرتا، جن میں سب سے اہم جنگ کو روکنا ہے۔ اس سے پہلے وائٹ ہاؤس کی ترجمان کیرولین لیویٹ نے نیوز بریفنگ میں کہا تھا کہ اسرائیل نے جنگ بندی کی امریکی تجاویز پر دستخط کردیے ہیں، جس کے بعد اسے حماس کو بھیجا گیا ہے۔