Raza Musani 
لندن : بی بی سی نے دعویٰ کیا ہے کہ غزہ میں حماس کی عسکری قیادت نے مجوزہ جنگ بندی منصوبے پر اعتراض کرتے ہوئے اسے مسترد کردیاہے۔ بی بی سی نے اپنے ذرائع کے حوالے سے بتایا کہ حماس کی عسکری قیادت کا موقف ہےکہ یہ منصوبہ اسرائیلی شرائط کے زیادہ قریب ہے اور فلسطینی خودمختاری کو نظرانداز کرتا ہے۔ انہوں نے کہا کہ منصوبے میں اسرائیلی فوج کی مکمل واپسی کی کوئی ضمانت موجود نہیں نہ ہی یہ فلسطینیوں کو آزادانہ سیاسی و انتظامی کنٹرول فراہم کرتا ہے۔
عسکری رہنماؤں کا مؤقف ہے کہ ایسی جنگ بندی غزہ کی مزاحمتی قوتوں کو غیر مسلح کرنے اور ان کی سیاسی پوزیشن کو کمزور کرنے کے مترادف ہے۔ رپورٹ میں کہا گیا ہے کہ اس اختلاف کے باعث حماس کے اندر فیصلہ سازی میں تقسیم سامنے آئی ہے، جہاں سیاسی قیادت مذاکراتی عمل کے لیے نسبتاً نرم مؤقف رکھتی ہے جبکہ عسکری قیادت سخت شرائط پر اصرار کر رہی ہے۔ تجزیہ کاروں کے مطابق یہ اختلاف مستقبل کے امن عمل اور خطے میں طاقت کے توازن پر گہرے اثرات ڈال سکتا ہے۔
