Raza Musani 
واشنگٹن: امریکا میں گن کلچر مزید 10 افراد کی جان لے گیا۔ فائرنگ کے واقعات مشی گن، ٹیکساس،اوریگن اور دارالحکومت واشنگٹن میں پیش آئے۔ ریاست اوریگن میں دارالحکومت سیلم سے 130 میل دور شہر بینڈ کے ایک شاپنگ سینٹر میں فائرنگ کے واقعے میں حملہ آور سمیت 3 افراد ہلاک ہو گئے۔ ادھر ٹیکساس کے شہر ہوسٹن میں مسلح شخص نے پہلے چند گھروں کو آگ کو لگا دی اور جب رہائشی خوف سے باہر نکلے تو ان پر گولیاں برسادیں جس کے نتیجے میں 3 افراد ہلاک ہوگئے۔ پولیس کی جوابی فائرنگ میں حملہ آور مارا گیا۔ ایک اور واقعہ مشی گن کے شہر ڈیٹرائٹ میں پیش آیا جہاں کار سوار نے مختلف مقامات پر راہگیروں اور ایک کار سوار کو نشانہ بنایا جس کے نتیجے میں 3 افراد ہلاک اور 2 زخمی ہوگئے۔مشی گن پولیس نے ایک مشتبہ شخص کی تصویر جاری کرتے ہوئے گرفتاری میں مدد کی اپیل کی ہے جب کہ ہلاک ہونے والوں کی شناخت ظاہر نہیں کی ہے۔دارالحکومت واشنگٹن میں ایک فٹ بال کھلاڑی کو نامعلوم شخص نے گولی ماری تاہم فٹبالر حملے میں محفوظ رہے تاہم انھیں شدید زخم آئے ہیں اور وہ اسپتال میں زیر علاج ہیں۔
