پاکستان میں عام انتخابات 8 فروری کو ہی ہوں گے، سپریم کورٹ

اسلام آباد: پاکستان میں انتخابات آٹھ فروری کو ہی ہوں گے۔ سپریم کورٹ نے واضح کردیا۔ بلوچستان میں حلقہ بندیوں پر اعتراض کی درخواستوں کو رد کرتے ہوئے۔ عدالت نے فیصلہ جاری کردیا کہا کہ ملک میں انتخابات میں تاخیر کی کسی کوشش کو کامیاب نہیں ہونے دیا جائے گا۔ قائم مقام چیف جسٹس سردار طارق مسعود کی سربراہی میں تین رکنی بینچ نے بلوچستان کے حلقہ پی پی 12 میں حلقہ بندی سے متعلق نظرثانی درخواست پر سماعت کی جس دوران قائم مقام چیف جسٹس نے درخواست گزار سے مکالمہ کیا کہ عام انتخابات کی تاریخ آنے سے ملک میں تھوڑا استحکام آیا ہے، کیا آپ ملک میں استحکام نہیں چاہتے؟ عام انتخابات کی تاریخ آنا کوئی معمولی بات نہیں ہے۔ اس پر وکیل درخواست گزار قمر افضل نے کہا کہ انتخابی حلقہ بندی سے متعلق غلط فیصلہ کیا گیا، اس پر جسٹس منصور علی شاہ نے کہا کہ الیکشن پروگرام جاری ہوچکا ہے اور اب کچھ نہیں ہوسکتا، انفرادی درخواستوں پر فیصلہ دینے لگ گئے تو الیکشن کا عمل متاثر ہوگا، ایسی درخواستوں پر عام انتخابات کیلئے 8 فروری کی تاریخ ڈسٹرب نہیں کریں گے.