غاصب اسرائیل نے نویں روز بھی غزہ پر بم برسائے، شہداء کی تعداد ڈھائی ہزار سے تجاوز

غزہ: غاصب اسرائیل نے نویں روز بھی غزہ پر جگہ جگہ بم برسائے۔ 24 گھنٹے میں مزید 410 فلسطینی شہید ہوگئے۔ شہدا کی تعداد ڈھائی ہزار سے تجاوز کرگئی۔ جبکہ آٹھ ہزار سے زائد زخمی ہیں۔ رپورٹ کے مطابق غزہ میں ایک چوتھائی ایٹم بم کی طاقت کے برابر بم معصوم شہریوں پر گرائے جاچکے ہیں۔ حملے میں فلسطینیوں کی ستر ہزار کے قریب رہائش گاہیں تباہ ہوچکیں۔ 4 لاکھ تباہ حال فلسطینی محفوظ پناہ کی تلاش میں دربدر ہیں۔
ادھر صیہونی فوج نے غزہ پر بڑے زمینی، فضائی اور بحری حملے کی تیاری مکمل کرلی۔ جبکہ صیہونی حکومت کے الٹی میٹم کے بعد شمالی غزہ سے نقل مکانی کا سلسلہ جاری ہے۔ اسرائیلی فوج کے ترجمان جوناتھن کونریکس نے کہاہے کہ جنوبی غزہ سے سول آبادی منتقل ہوتے ہی تین طرف سے فوجی آپریشن شروع ہوجائے گا۔ اسرائیل نے غزہ کے قریب لاکھوں فوجی،ٹینکس اور بھاری توپخانہ پہنچا دیا ہے۔صیہونی وزیراعظم نیتن یاہو نے بھی اگلے مورچوں کا دورہ کیا۔ صیہونی حکومت کے الٹی میٹم کے بعد شمالی غزہ سے نقل مکانی کا سلسلہ جاری ہے۔