غزہ کرہ ارض پر دوزخ سے بدتر جگہ بن چکی ہے، سربراہ ریڈ کراس

جنیوا : عالمی امدادی تنظیم ریڈ کراس کی سربراہ مرجانا سپلولجیرک کا کہنا ہے غزہ اس وقت کرہ ارض پر دوزخ سے بھی بدتر جگہ بن چکی ہے۔ مرجانا سپلولجیرک نے بی بی سی کو انٹرویو میں کہا کہ انسانیت ہار رہی ہے کیونکہ وہ کھلی آنکھوں سے غزہ میں ہولناکیوں کو دیکھ رہی ہے۔ ہم یہ دیکھنا جاری نہیں رکھ سکتے۔ انہوں نے کہا کہ غزہ میں تباہی اور مصائب کی سطح یہ کسی بھی قابل قبول، قانونی، اخلاقی اور انسانی معیار سے تجاوز کرچکی ہے۔ انہوں نے کہا کہ فلسطینیوں سے انسانی وقار چھین لیا گیا ہے عالمی قوانین کو ردی کی ٹوکری کی نذر کیا جا رہا ہے۔ انہوں نے مزید کہا کہ ریاستوں کو جنگ اور فلسطینیوں کے مصائب کے خاتمے اور اسرائیلی یرغمالیوں کی رہائی کے لیے مزید کام کرنا چاہیے۔