کانگریس میں فنڈنگ منظور، امریکی حکومت شٹ ڈاؤن سے بال بال بچ گئی

واشنگٹن :امریکی سینیٹ نے آخری لمحات میں فنڈنگ کے بل کی منظوری دیکر بائیڈن حکومت کو شٹ ڈاؤن سے بچالیا۔ امریکی سینیٹ کا ہفتے کی رات شٹ ڈاؤن کے وقت سے کچھ دیر قبل غیر معمولی اجلاس ہوا جس میں فنڈنگ بل کی منظوری دی گئی اور اسے دستخط کیلئے صدر جو بائیڈن کو بھیج دیا گیا۔ بل 9 کے مقابلے میں 88 ووٹوں سے منظور کیا گیا۔ اس سے وفاقی حکومت کو 17 نومبر تک فنڈنگ مل سکے گی۔ تاہم اس میں یوکرین کے لیے رقم شامل نہیں ہوگی۔ سینیٹ کے اکثریتی رہنما چک شومر نے ووٹنگ کے بعد ایک بیان میں کہا کہ ہم شٹ ڈاؤن سے گریز کریں گے۔ دو طرفہ تعلقات جو سینیٹ کا ٹریڈ مارک رہا ہے غالب آ گیا ہے۔ اب عوام راحت کی سانس لے سکتے ہیں۔اگر یہ بل کانگریس سے منظور نہ ہوتا اور ہفتہ کی آدھی رات تک صدر کے دستخط نہ ہوتے تو شٹ ڈاؤن یقینی تھا۔ سینیٹ سے قبل ایوان نمائندگان نے بھی دوسرے غیر معمولی اجلاس میں بل کی منظوری دی۔ بل کے حق میں 335 اور مخالفت میں 91 ووٹ پڑے۔