فرانس کا ستمبر میں فلسطینی ریاست کو تسلیم کرنے کا اعلان

پیرس : فرانسیسی صدر ایمانوئل میکرون نے کہا ہے کہ وہ ستمبر میں اقوام متحدہ کی جنرل اسمبلی کے اجلاس کے موقع پر فلسطینی ریاست کو تسلیم کرنے کا باضابطہ اعلان کریں گے۔ سوشل میڈیا ایپ ایکس پر بیان میں میکرون نے کہا کہ مشرق وسطیٰ میں منصفانہ اور دیرپا امن کے لیے اپنی تاریخی وابستگی کے تحت انہوں نے فیصلہ کیا ہےکہ فرانس فلسطین کی ریاست کو تسلیم کرے گا۔
انہوں نے غزہ میں تنازع کے خاتمے اور جنگ سے متاثرہ شہریوں کو امداد فراہم کرنے کی فوری ضرورت پر زور دیا۔ انہوں نے کہا کہ آج کی فوری ترجیح غزہ میں جنگ کا خاتمہ اور شہری آبادی کو بچایا جانا ہے۔ انہوں نے فوری جنگ بندی، تمام یرغمالیوں کی رہائی اور بڑے پیمانے پر انسانی امداد کا مطالبہ کیا۔ میکرون نے حماس کو غیر مسلح کرنے، غزہ کو محفوظ بنانے اور دوبارہ تعمیر کرنے کی ضرورت کو بھی اجاگر کیا۔ انہوں نے کہا کہ فرانسیسی عوام امن چاہتے ہیں اور اسے حاصل کرنے کے لیے اسرائیلیوں، فلسطینیوں اور بین الاقوامی شراکت داروں کے درمیان مشترکہ کوششوں کی ضرورت ہے۔