سپاہ پاسداران کی عوامی محبوبیت سے خوفزدہ دشمن اس کی ساکھ خراب کرنے کی پالیسی پر گامزن ہے، ولی امر مسلمین

تہران: ولی امر مسلمین آیت اللہ خامنہ ای نے کہاہے کہ سپاہ پاسداران انقلاب اور بسیج کو عوامی محبوبیت حاصل ہے اسی لئے دشمن ان کا امیج خراب کرنے کی پالیسی پر گامزن ہیں۔ سپاہ پاسداران انقلاب اسلامی کے اعلی افسران نے حسینیہ امام خمینیؒ میں ولی امر مسلمین سے ملاقات کی۔ ولی امر مسلمین نے کہا کہ دشمن کی فعالیت اور پالیسی کا ایک پہلو سپاہ کا امیج خراب کرنا ہے۔ اس کی وجہ یہ ہے کہ سپاہ اور بسیج عوام کے درمیان نہایت محبوب ہیں۔ اسی کشش اور محبوبیت نے دشمن کو حواس باختہ کردیا ہے۔ دشمن مختلف پروپیگنڈوں اور افواہوں کے ذریعے ان محبوب اور معروف اداروں کا تشخص بگاڑنا چاہتے ہیں۔ انہوں نے کہاکہ دشمنوں کے پاس جھوٹی خبروں، افواہوں اور ہر قسم کی چالوں کے سوا سپاہ پاسداران انقلاب کی ساکھ کو خراب کرنے کا کوئی راستہ نہیں ہے۔ ولی امر مسلمین نے ایلیٹ فورس کو دنیا کی سب سے بڑی انسداد دہشت گردی تنظیم کے طور پر سراہا۔ آیت اللہ خامنہ ای نے مزید کہا کہ یہ ایک اچھی طرح سے لیس فوجی تنظیم ہے, یہ ایک موثر اور خود مختار ادارہ ہے جو ایسے کاموں کو انجام دینے کی صلاحیت رکھتا ہے جو دنیا کی بہت سی بڑی فوجیں انجام نہیں دے سکتیں۔