چیئرمین پی ٹی آئی کے ایک اور قریبی ساتھی فرخ حبیب ساتھ چھوڑ گئے

لاہور: سابق وزیراعظم اور چیئرمین پی ٹی آئی کے ایک اور قریبی ساتھی فرخ حبیب ساتھ چھوڑ گئے۔ کئی روز سے لاپتہ پاکستان تحریک انصاف کے رہنما فرخ حبیب استحکام پاکستان پارٹی کے دفتر میں منظرعام پر آگئے، پی ٹی آئی چھوڑنے اور استحکام پاکستان پارٹی میں شمولیت کا اعلان کردیا۔
فرخ حبیب نے استحکام پاکستان پارٹی کے دفتر میں پریس کانفرنس کرتے ہوئے تحریک انصاف سے علیحدگی کا اعلان کیا اور کہا کہ آج میں استحکام پاکستان پارٹی میں شامل ہو رہا ہوں۔ پی ٹی آئی کے اہم رہنما فرخ حبیب اچانک منظر عام پر آئے اور پی ٹی آئی کے باغی رہنماؤں کوجمع کرکے بنائی گئی استحکام پاکستان پارٹی میں شمولیت کا اعلان کردیا۔ انہوں نے نیوز کانفرنس میں کہا کہ چیئرمین پی ٹی آئی کی ذمہ داری تھی کہ وہ نو مئی کے واقعات کے بعد تدبر اور ذمہ داری کا مظاہرہ کرتے۔ وہ چاہتے تھے کہ لوگ ان کے لیے باہر لڑیں۔ آپ کے پاس یہ راستہ تھا کہ آپ قانون کا سامنا کرتے۔ فرخ حبیب نےکہاکہ 9 مئی کو جو ہوا، اسے سیاہ دن کے طور پر یاد رکھا جائے گا۔ یہ قابل مذمت اور افسوس ناک ہے۔