اسرائیلی کارروائیوں میں توسیع کے نتائج خطرناک ہوں گے، گوتریس

نیویارک: اقوام متحدہ کے سربراہ انتونیو گوتریس نے کہا ہے کہ غزہ سٹی میں اسرائیلی فوجی کارروائیوں میں توسیع پر مبنی منصوبے کے نتائج خطرناک ہوں گے۔ سلامتی کونسل کے اجلاس سے قبل میڈیا سے گفتگو میں انتونیو گوتریس نے کہا کہ لاکھوں شہری پہلے ہی تھکے ہوئے اور صدمے کا شکار ہیں وہ ایک بار پھر بھاگنے پر مجبور ہو جائیں گے۔ جس سے خاندان اور بھی گہرے خطرے میں ڈوب جائیں گے۔ یہ سلسلہ رکنا چاہیے۔ انہوں نے کہا کہ اسرائیل کے غیر ذمے دارانہ حملوں کو دنیا دیکھ رہی ہے اس کی جوابدہی کی جانی چاہئے۔
سربراہ یو این نے مزید کہا کہ غزہ میں لوگ بھوک سے مررہے ہیں، یہ ایسے دانستہ فیصلوں کا نتیجہ ہے جو بنیادی انسانیت کی نفی ہے، عام شہریوں کو بھوکا رکھنا کبھی بھی جنگ کا طریقہ نہیں ہونا چاہیے۔ اقوام متحدہ سربراہ نے ایک بار پھر غزہ میں مستقل جنگ بندی، بلا روک ٹوک امداد کی رسائی اور یرغمالیوں کی رہائی کی اپیل کردی۔