Raza Musani 
تہران : ایرانی وزیر خارجہ عباس عراقچی نے کہا ہےکہ یورپی ممالک نے خود ایٹمی معاہدے کی خلاف ورزی کی ہے انہیں ایران کیخلاف نام نہاد اسنیپ بیک میکانزم کے تحت پابندیاں دوبارہ لگانے کا کوئی حق نہیں ہے۔
عباس عراقچی نے کہا کہ تہران کی حکمت عملی روس اور چین کے ساتھ گہرے تعاون کے ذریعے پابندیوں کی بحالی کو روکنا ہے۔ انہوں نے کہا کہ یہ شراکت داری تیزی سے اہمیت اختیار کر گئی ہے کیونکہ ایران یکطرفہ امریکی اور یورپی اقدامات کا مقابلہ کرنے کے لیے اپنے علاقائی اور عالمی اتحاد کو مضبوط کر رہا ہے۔ وزیر خارجہ نے ایران کو عدم استحکام سے دوچار کرنے کی اسرائیلی کوششوں کو مسترد کرتے ہوئے کہا کہ اسرائیل کا خیال تھا کہ وہ ایرانی عوام کو حکومت کے خلاف کر سکتا ہے لیکن ہوا اس کے برعکس کیونکہ عوام اپنی قیادت کے ساتھ مضبوطی سے کھڑے ہیں۔
