غزہ پر کسی غیر ملکی انتظام کو قبول نہیں کیا جائے گا، مصر

قاہرہ : مصر کے وزیرِ خارجہ بدر عبدالعاطی نے کہا ہے کہ غزہ پر حکومت صرف فلسطینی کریں گے۔ کسی بھی غیر ملکی یا عارضی انتظام کو ہرگز قبول نہیں کیا جائے گا۔ قطر کے دوحہ فورم میں اظہار خیال کرتے ہوئے بدر عبدالعاطی نے کہا کہ غزہ میں انتظامی امور فلسطینیوں کے خود مختار فیصلے پر مبنی ہوں گے۔ امریکی تجویز کردہ ٹیکنوکریٹ حکومت یا کسی خارجی نگرانی کو تسلیم نہیں کیا جائے گا۔ مصر کے وزیرخارجہ نے غزہ میں زرد لائن کے اطراف بین الاقوامی امن فوج تعینات کرنے کی ضرورت پر زور دیا جو اسرائیلی فوجی موجودگی والے علاقوں کو باقی حصوں سے الگ کرتی ہے۔ بدر عبدالعاطی نے انسانی ہمدردی کے بحران پر بھی روشنی ڈالتے ہوئے کہا کہ تمام سرحدی راستے کھولے جائیں تاکہ لاکھوں فلسطینیوں کو فوری امداد پہنچائی جا سکے۔ انہوں نے واضح کیا کہ رفح کراسنگ فلسطینیوں کی بے دخلی کے لیے استعمال نہیں ہوگی اور اس کا صرف دونوں طرفہ کھلا ہونا یقینی بنایا جائے گا۔