Raza Musani 
قاہرہ : مصر حکومت میں مساجد کے اندر عطیات یا خصوصی بکسوں کے ذریعے مالی رقوم جمع کرنے پر پابندی عائد کر دی۔ وزارت اوقاف کے نوٹفکیشن میں کہا گیا ہے کہ 10 روز کے اندر مساجد سے عطیات اور چندے کے خصوصی بکسوں کو ہٹا دیا جائے۔ خلاف ورزی کرنے والوں کےخلاف تادیبی کارروائی ہو گی۔فیصلے کا اطلاق تمام سرکاری مساجد پر ہو گا۔ استثناء حاصل کرنے والی مساجد کے ناموں اور ان میں بکسوں کی تعداد سے متعلق فیصلہ چند روز میں سامنے آ جائے گا۔حکام کاموقف ہے کہ کالعدم تنظیمیں عطیات کی رقوم تنظیمی اور دہشت گرد سرگرمیوں پر خرچ کرتی ہیں۔ اخوان المسلمین قانونی نگرانی کے بغیر مساجد کے ذریعے اپنے لیے مالی رقوم جمع کر رہی تھی۔مصری وزیر اوقاف ڈاکٹر محمد مختار کا کہنا ہے کہ ان کی وزارت بینکوں کے ساتھ مل کر بعض وسائل پر غور کر رہی ہے جن کو عطیات کے واسطے استعمال کیا جا سکتا ہے۔ اس کا مقصد عطیات کی رقوم کے حوالے سے اعلیٰ درجے کی شفافیت اور نگرانی کو یقینی بنانا ہے۔
