Raza Musani 
دمشق: شام پر مسلط اسرائیل نواز صدر احمد الشرع نے دروز اقلیت کی خود مختاری کی کوششوں کو مسترد کرتے ہوئے دعویٰ کیا ہے کہ ملک کا اتحاد خون سے نہیں ہونا چاہیے۔ سرکاری ٹی وی پر ایک بیان میں احمد الشرع نے کہا کہ شام کو متحد کرنے کیلئے ہمارے سامنے ایک اور جنگ باقی ہے لیکن یہ کام خون اور فوجی طاقت سے نہیں افہام و تفہیم سے ہونا چاہیے کیونکہ شام جنگ سے تھک چکا ہے۔ انہوں نےکہا کہ میں شام کو تقسیم کے خطرے سے دوچار نہیں دیکھتا۔ کچھ لوگ شام کو تقسیم کرنے اور چھاؤنیاں قائم کرنے کی کوشش کرنا چاہتے ہیں لیکن یہ ناممکن ہے۔
اسرائیل، امریکا، ترکیہ اور سعودی عرب کی مدد سے اقتدار پر قبضہ کرنے والے احمد الشرع نے کہا کہ کچھ جماعتیں علاقائی طاقت، اسرائیل یا دیگر ذرائع سے اقتدار حاصل کرنا چاہتی ہیں لیکن یہ ناممکن ہے۔ احمد الشرع نے اعتراف کیا کہ سویدہ میں فوج نے انسانی حقوق کی بہت سی خلاف ورزیاں کی ہیں۔ ریاست کو تمام خلاف ورزیوں کے مرتکب افراد کا احتساب کرنے کی ضرورت ہے۔
