Raza Musani 
واشنگٹن : امریکا کے وسط مدتی انتخابات میں ناکامی پر سابق صدر ٹرمپ کی ری پبلکنز پارٹی میں پھوٹ پڑگئی۔ ری پبلکنز رہنماؤں نے شکست اور ناقص کارکردگی کا ذمہ دار ڈونلڈ ٹرمپ کو ٹہرادیا۔ تین سینیٹرز نے پارٹی قیادت کو خط لکھ کر اگلے ہفتے ہونیوالے پارٹی انتخابات ملتوی کرنے کا مطالبہ کردیا۔ خط میں کہا گیا ہے کہ ہم سب مایوس ہیں کہ ایک سرخ لہر عمل میں نہیں آ سکی۔ ضرورت ہے کہ 2024 کے صدارتی الیکشن میں اپنے امکانات کو بہتر بنانے سے متعلق سنجیدہ بات چیت کی جائے۔ میسوری سے سینیٹر جوش ہولی نے ٹویٹ کیا کہ پرانی جماعت مرچکی ہے۔ اسے دفنانے کا وقت آگیا ہے۔ نیو ہیمپشائر کے گورنر کرس سنونو نے کہاکہ ڈونلڈ ٹرمپ کا اگلے ہفتے دوسری بار صدارتی الیکشن میں حصہ لینے کا اعلان ایک خوفناک خیال ہوگا۔ سینیٹر بل کیسسڈی نے کہاکہ سابق صدرسے قریبی امیدواروں نے خراب کارکردگی کا مظاہرہ کیا۔ میری لینڈ کےگورنرلیری ہوگن نےکہا کہ جوبائیڈن کی غیر مقبولیت کی وجہ سے انتخابات میں واضح کامیابی ملنی چاہئے تھی لیکن یہ لگاتار تیسرا الیکشن ہے جس کا نتیجہ ہمیں ٹرمپ کی وجہ سے بھگتنا پڑا ہے۔
