غزہ میں المیہ کے خاتمے کیلئے اسرائیل پر دباؤ ڈالتے رہیں گے، ڈنمارک

لندن : ڈنمارک کی وزیراعظم میٹے فریڈریکسن نے کہا ہے کہ ڈنمارک یورپی یونین کےصدر کی حیثیت سے اسرائیل پر دباؤ ڈالنے کی کوششیں جاری رکھے گا تاکہ غزہ میں ہولناک انسانی المیے کا خاتمہ ہو۔ میٹے فریڈریکسن نے غزہ میں انسانی المیے کو انتہائی ہولناک اور تباہ کن قرار دیتے ہوئے اسرائیل کے مغربی کنارے میں نئی آبادکاری منصوبے کی شدید مذمت کی۔ انہوں نے کہا کہ اسرائیل پر دباؤ ڈالنے کے لیے ہمیں دیگر یورپی ممالک کی حمایت حاصل کرنے میں مشکل کا سامنا ہے۔
ڈنمارک کی وزیر اعظم نے کہا کہ نیتن یاہو اب ایک خود ساختہ مسئلہ بن چکے ہیں۔ اسرائیل پر پابندیوں سے متعلق انھوں نے عندیہ دیا کہ وہ سیاسی دباؤ بڑھانے کے ساتھ ساتھ اقتصادی اور تحقیقی شعبے میں بھی پابندیوں پر غور کر رہی ہیں۔ جن میں تجارتی یا تحقیقی تعاون معطل کرنا بھی شامل ہے۔ میٹے فریڈریکسن نے کہا کہ ان کی اولین ترجیح اسرائیل کو سخت پیغام دینا ہے تاکہ وہ انسانی المیے کو کم کرے اور جنگی کارروائیوں کو محدود کرے۔